தமிழ்
பல சேமிப்பாளர்களுக்கு ஃபிக்சட் டெபாசிட் என்பது ஒரு நிலையான சேமிப்பு முறையாக தோன்றுகிறது. ஏனெனில் இதில் நீங்கள் ஒரு குறிப்பிட்ட தொகையை ஒரு குறிப்பிட்ட காலத்திற்கு லாக்-இன் செய்து, அதற்கு நிலையான வருமானத்தைப் பெற முடியும். முதலீட்டின் முடிவு என்னவாக இருக்கும் என்பதை முன்கூட்டியே தெரிந்துகொள்வதில் ஒரு நிம்மதி இருக்கிறது.
இருந்தபோதிலும், தற்போது சேமிப்பு முறைகள் மாறிவருகின்றன. முதலீட்டாளர்கள் இப்போது தங்களின் வருமானம், லிக்விடிட்டி மற்றும் வரி தாக்கம் ஆகியவற்றை மிக உன்னிப்பாக ஒப்பிட்டுப் பார்க்கிறார்கள். இங்குதான் ஃபிக்சட் டெபாசிட்டிற்கு மாற்றான பிற முதலீடுகள் பற்றிய விவாதங்கள் தொடங்குகின்றன.
சிலர் அதிக வருமானத்தை எதிர்பார்க்கும்போது, வேறு சிலரோ நெகிழ்வுத்தன்மை அல்லது பணவீக்கப் பாதுகாப்பு போன்றவற்றை விரும்புகிறார்கள். ஃபிக்சட் டெபாசிட்டுகள் இன்னமும் ஒரு முக்கிய நோக்கத்தை நிறைவேற்றினாலும் (குறிப்பாகப் பாரம்பரிய முதலீட்டாளர்களுக்கு), முதலீட்டு முடிவுகளை எடுப்பதற்கு முன்பு அவை டெப்ட் ஃபண்டுகள், பாண்டுகள் அல்லது பிற முதலீட்டுத் திட்டங்களுடன் எவ்வாறு ஒப்பிடப்படுகின்றன என்பதைப் புரிந்துகொள்வது அவசியமாகும்.
முக்கிய அம்சங்கள்
- ஃபிக்சட் டெபாசிட்டுகள் மூலதனப் பாதுகாப்பையும் நிலையான வருமானத்தையும் வழங்குகின்றன, ஆனால் இதிலிருந்து கிடைக்கும் வட்டிக்கு வரி விதிக்கப்படும். மேலும், இதன் வளர்ச்சி பணவீக்கத்தை விட அதிகமாக இருக்காது.
- லிக்விடிட்டி மாறுபடலாம்; மெச்சூரிட்டி காலத்திற்கு முன்பே பணத்தை எடுப்பது வருமானத்தைக் குறைக்கக்கூடும்.
- டெப்ட் ஃபண்டுகள், பாண்டுகள் மற்றும் ஈக்விட்டிகள போன்ற மாற்று வழிகள் வெவ்வேறு விதமான ரிஸ்க்-வருமான ப்ரொபைல்களை வழங்குகின்றன.
- எந்தத் திட்டத்தைத் தேர்ந்தெடுக்க வேண்டும் என்பது முதலீட்டாளரின் ரிஸ்க் எடுக்கும் திறன், முதலீட்டுக் காலம் மற்றும் வரிக்கு பிந்தைய வருமானம் ஆகியவற்றைப் பொறுத்தது.
ஃபிக்சட் டெபாசிட் பற்றிப் புரிந்துகொள்ளுதல்
ஃபிக்சட் டெபாசிட் என்பது வங்கிகள் மற்றும் நிதி நிறுவனங்களால் வழங்கப்படும் ஒரு நிதி தயாரிப்பு ஆகும். இதில் ஒரு குறிப்பிட்ட வட்டி விகிதத்தில், ஒரு குறிப்பிட்ட காலத்திற்குப் பணம் டெபாசிட் செய்யப்படுகிறது. டெபாசிட் காலம் முழுவதும் இந்த வட்டி விகிதம் மாறாமல் இருக்கும், இது மெச்சூரிட்டி மதிப்பை முன்கூட்டியே துல்லியமாக உறுதி செய்கிறது. இதற்கான கால வரம்பு சில மாதங்கள் முதல் பல ஆண்டுகள் வரை இருக்கலாம்.
வட்டித் தொகையானது குறிப்பிட்ட கால இடைவெளிகளிலோ அல்லது மெச்சூரிட்டியின் போதோ செலுத்தப்படலாம். இரண்டு வகையான முதலீட்டாளர்கள் தங்கள் கூடுதல் பணத்தைச் சேமிக்க ஃபிக்சட் டெபாசிட்டைப் பயன்படுத்துகிறார்கள். ஒரு தரப்பினர் நீண்ட கால அடிப்படையிலும், மற்றொரு தரப்பினர் குறுகிய கால நோக்கங்களுடனும் முதலீடு செய்கிறார்கள்.
மூத்த குடிமக்களுக்கு பொதுவாகச் சில கூடுதல் வட்டி விகிதம் வழங்கப்படுகிறது. இருப்பினும், பெறப்படும் வட்டியானது முதலீட்டாளரின் வருமான வரி வரம்பிற்கு ஏற்ப வரிக்கு உட்பட்டது. மேலும், மெச்சூரிட்டிக்கு முன்பே பணத்தை எடுக்க அனுமதி இருந்தாலும், அதற்கு ஒரு குறிப்பிட்ட அபராதம் விதிக்கப்படலாம்.
சுருக்கமாக கூறினால், மூலதனப் பாதுகாப்பு மற்றும் நிலையான வருமானம் ஆகியவற்றிற்கு ஃபிக்சட் டெபாசிட்டுகள் சிறந்தவை. இருப்பினும், நீண்ட காலத்தில் பணவீக்கத்தை விட அதிக வருமானத்தை இவற்றால் தர முடியாது. இதனால்தான், பணத்தை முதலீடு செய்வதற்கு முன்பு வருமான எதிர்பார்ப்புகள், வரி விதிப்பு மற்றும் லிக்விடிட்டி ஆகியவற்றைப் புரிந்துகொள்வது மிகவும் முக்கியம்.
பிக்சட் டெபாசிட்டின் நன்மைகள்
1. உத்தரவாதமான வருமானம்:
பங்குகள் அல்லது மியூச்சுவல் ஃபண்டுகள் போலல்லாமல், ஃபிக்சட் டெபாசிட்டுகள் முழு முதலீட்டுக் காலத்திற்கும் முன்கூட்டியே தீர்மானிக்கப்பட்ட வட்டி விகிதத்தை வழங்குகின்றன. இந்தத் துல்லியமான கணிப்புத்தன்மை உங்கள் முதலீடு எவ்வளவு வளரும் என்பதைத் தெளிவாகக் காட்டுவதால், உங்களால் நிதித் திட்டமிடலையும் பட்ஜெட்டையும் மிகச் சரியாகச் செய்ய முடியும்.
2. பாதுகாப்பு மற்றும் நம்பகத்தன்மை:
ஃபிக்சட் டெபாசிட்டுகள் குறைந்த ரிஸ்க் கொண்ட முதலீடுகளாகக் கருதப்படுகின்றன. இந்தியாவில் டெபாசிட் இன்சூரன்ஸ் மற்றும் கிரெடிட் கேரண்டி கார்ப்பரேஷன் (DICGC) மூலம் ஒரு குறிப்பிட்ட அதிகபட்ச வரம்பு வரை உங்கள் டெபாசிட்டிற்குப் பாதுகாப்பு அளிக்கப்படுவதால், உங்கள் அசல் தொகையை இழக்கும் அபாயம் மிகவும் குறைவு. இதன் காரணமாக, இது உங்கள் கடின உழைப்பின் பணத்திற்குப் பாதுகாப்பான புகலிடமாக விளங்குகிறது.
3. எளிதான அணுகல் மற்றும் நெகிழ்வுத்தன்மை:
பாரம்பரிய ஃபிக்சட் டெபாசிட்டுகள் உங்கள் பணத்தை ஒரு குறிப்பிட்ட காலத்திற்கு லாக்-இன் செய்தாலும், இப்போது பல வங்கிகள் நெகிழ்வான விருப்பங்களை வழங்குகின்றன. சில ஃபிக்சட் டெபாசிட்டுகள் குறிப்பிட்ட காலத்திற்குள் பகுதியளவு பணத்தை எடுக்க அனுமதிக்கின்றன, வேறு சில திட்டங்கள் உங்கள் சேமிப்புக் கணக்குடன் இணைக்கப்பட்டு, தேவைப்படும்போது எளிதாகப் பணத்தைப் பயன்படுத்த வழிவகை செய்கின்றன. மேலும், ஃபிக்சட் டெபாசிட்டுகளைப் பிணையாக வைத்து நீங்கள் கடன்களையும் பெற முடியும்.
4. பல்வேறு கால வரம்புகள்:
ஃபிக்சட் டெபாசிட்டுகளின் காலம் சில நாட்கள் முதல் பல ஆண்டுகள் வரை இருக்கலாம். இது உங்கள் தேவைகளுக்கு ஏற்ப முதலீட்டை தனிப்பயனாக்க அனுமதிக்கிறது; அது ஓய்வூதியத்திற்கான நீண்ட கால இலக்காக இருந்தாலும் சரி அல்லது ஒரு சுற்றுலா செல்லவதற்கான குறுகிய கால இலக்காக இருந்தாலும் சரி, அதற்கேற்ற திட்டத்தை தேர்வு செய்து கொள்ளலாம்.
5. வட்டி செலுத்தும் விருப்பங்கள்:
உங்கள் ஃபிக்சட் டெபாசிட் மூலம் ஈட்டப்படும் வட்டியை நீங்கள் எவ்வாறு பெற விரும்புகிறீர்கள் என்பதைத் தேர்ந்தெடுக்கும் ஆப்ஷன் உங்களுக்கு உள்ளது. உங்கள் வழக்கமான வருமானத்திற்குப் பக்கபலமாக இருக்க மாதந்தோறும் வட்டியைப் பெறலாம், அல்லது கூட்டு வட்டி மூலம் அதிக வருமானம் பெற வட்டியை மீண்டும் முதலீடு (reinvest) செய்யலாம்.
ஃபிக்சட் டெபாசிட்டின் தீமைகள்
1. குறைந்த வளர்ச்சித் திறன்:
ஃபிக்சட் டெபாசிட் வட்டி விகிதங்கள் பணவீக்கத்தை விடக் குறைவாகவோ அல்லது அதற்கு இணையாகவோ மட்டுமே இருக்கும். அதாவது, காலப்போக்கில் உங்கள் பணத்தின் வாங்கும் திறன் குறையக்கூடும். நீண்ட கால முதலீட்டு இலக்குகளைக் கொண்டவர்கள், பணவீக்கத்தை முறியடித்து ஒரு நேர்மறையான 'உண்மையான வருமானத்தை' பெற விரும்பினால், இதைக் கண்டிப்பாக கவனத்தில் கொள்ள வேண்டும்.
2. வரம்புக்குட்பட்ட லிக்விடிட்டி:
பாரம்பரிய ஃபிக்சட் டெபாசிட்டுகள் நீங்கள் தேர்ந்தெடுத்த காலம் வரை உங்கள் பணத்தை எடுக்கக் கட்டுப்பாடு விதிக்கின்றன. பகுதியளவு எடுத்தல் அல்லது இணைக்கப்பட்ட கணக்குகள் போன்ற நெகிழ்வுத்தன்மைகள் இருந்தாலும், மெச்சூரிட்டிக்கு முன்பே பணத்தை எடுக்கும்போது அபராதக் கட்டணங்கள் (பொதுவாக 0.5% முதல் 1% வரை வட்டி குறைக்கப்படும்) விதிக்கப்படும். இது உங்கள் ஒட்டுமொத்த வருமானத்தை கணிசமாகக் குறைக்கும். அவசர தேவைகளுக்காகத் தங்கள் முழு மூலதனத்தையும் உடனடியாக எடுக்க நினைக்கும் முதலீட்டாளர்களுக்கு இந்த லிக்விடிட்டி குறைபாடு ஏதுவாக இருக்காது.
3. வரி தாக்கங்கள் மற்றும் வரம்புக்குட்பட்ட நன்மைகள்:
ஈக்விட்டி லிங்க்ட் சேவிங்ஸ் ஸ்கீம்ஸ் (ELSS) போன்ற சில முதலீட்டு விருப்பங்களைப் போலல்லாமல், ஃபிக்சட் டெபாசிட்டின் வட்டி வருமானம் உங்கள் வருமான வரி வரம்பின்படி முழுமையாக வரிக்கு உட்பட்டது.
இது உங்கள் நிகர வருமானத்தைப் பாதிக்கும். 'டேக்ஸ்-சேவிங் ஃபிக்சட் டெபாசிட்டுகள்' செக்ஷன் 80C-ன் கீழ் வரி விலக்கு அளித்தாலும், அவை கட்டாயமாக 5 ஆண்டுகள் லாக்-இன் காலத்தைக் கொண்டுள்ளன. மேலும், அதிலிருந்து ஈட்டப்படும் வட்டிக்கு வரி விதிக்கப்படும் என்பதால், அதிக வருமான வரி வரம்பில் உள்ள முதலீட்டாளர்களுக்கு இது ஒரு பெரிய குறைபாடாகும்.
பிக்சட் டெபாசிட்டிற்கு மாற்றான முதலீட்டு வழிகள்
1. டெப்ட் மியூச்சுவல் ஃபண்டுகள்:
டெப்ட் மியூச்சுவல் ஃபண்டுகள் அரசு பாண்டுகள் மற்றும் கார்ப்பரேட் கடன் பத்திரங்களில் முதலீடு செய்கின்றன. இவை மிதமான ரிஸ்க்குடன், ஃபிக்சட் டெபாசிட்டை விட அதிக வருமானம் தரும் வாய்ப்பை வழங்குகின்றன. பொதுவாக இவை பங்குகளை விடக் குறைந்த ஏற்ற இறக்கம் கொண்டவை மற்றும் பல்வேறு கடன் பத்திரங்களில் முதலீடு செய்யப்படுவதால் ரிஸ்க் பரவலாக்கப்படுகிறது. இருப்பினும், சமீபத்திய வரி மாற்றங்களுக்குப் பிறகு, பெரும்பாலான டெப்ட் ஃபண்டுகளின் லாபத்திற்கு ஃபிக்சட் டெபாசிட் வட்டி போன்றே உங்கள் வருமான வரி வரம்பின்படி வரி விதிக்கப்படுகிறது.
2. லிக்விட் ஃபண்டுகள்:
குறுகிய கால முதலீட்டு இலக்குகள் அல்லது அவசரகால நிதிகளுக்கு லிக்விட் ஃபண்டுகள் மிகவும் உகந்தவை. இவை டிரெஷரி பில்கள் மற்றும் டெபாசிட் சான்றிதழ்கள் போன்ற அதிக லிக்விடிட்டி கொண்ட பத்திரங்களில் முதலீடு செய்கின்றன. குறைந்தபட்ச மீட்புக் கட்டுப்பாடுகளுடன் (பெரும்பாலும் T+1 நாள் அல்லது அதற்கும் குறைவான லிக்விடிட்டி) உங்கள் பணத்தை எளிதாக எடுக்க இவை வழிவகை செய்கின்றன. மேலும், இவை சாதாரண சேமிப்புக் கணக்குகளை விட சற்று கூடுதல் வருமானத்தை வழங்கலாம். இருப்பினும், லிக்விட் ஃபண்டுகளில் நீங்கள் முதலீடு செய்துப் 7 நாட்களுக்குப் பிறகு பணத்தை எடுத்தால் அபராதம் இல்லை, ஆனால் முதல் 7 நாட்களுக்குள் எடுத்தால் எக்ஸிட் லோடு (வெளியேறும் கட்டணம்) வசூலிக்கப்படும் என்பதை நினைவில் கொள்ளுவது அவசியம்.
3. ஈக்விட்டி ஃபண்டுகள்:
ஈக்விட்டி ஃபண்டுகள் நிறுவனங்களின் பங்குகளில் முதலீடு செய்வதன் மூலம் நீண்ட காலத்தில் மிகப்பெரிய மூலதன வளர்ச்சியை வழங்கும் திறனைக் கொண்டுள்ளன. இருப்பினும், ஈக்விட்டி ஃபண்டுகள் இயல்பாகவே ஃபிக்சட் டெபாசிட்டுகளை விட அதிக ஏற்ற இறக்கம் கொண்டவை மற்றும் அதிக ரிஸ்க் எடுக்கும் திறனைக் கோருபவை. சந்தை ஏற்ற இறக்கங்களை எதிர்கொள்ளும் மனப்பக்குவமும், சாத்தியமான நஷ்டங்களைத் தவிர்க்க நீண்ட கால முதலீட்டு நோக்கமும் முதலீட்டாளர்களுக்கு இருக்க வேண்டும்.
4. ரியல் எஸ்டேட் - அசையா சொத்து:
சொத்துக்களில் முதலீடு செய்வதன் மூலம் வாடகை வருமானத்தை ஈட்ட முடியும் மற்றும் நீண்ட கால மூலதன வளர்ச்சியையும் பெறலாம். இருப்பினும், ரியல் எஸ்டேட் முதலீட்டிற்கு ஒரு பெரிய ஆரம்பத் தொகை தேவைப்படுகிறது, தொடர்ந்து அதை நிர்வகிக்க வேண்டிய பொறுப்புகள் உள்ளன, மேலும் சொத்து மதிப்பில் ஏற்படும் ஏற்ற இறக்கங்கள் மற்றும் பிற நிதிச் சொத்துகளுடன் ஒப்பிடும்போது இதில் லிக்விடிட்டி (பணமாக்கும் வசதி) மிகவும் குறைவு போன்ற ரிஸ்க்குகளும் உள்ளன.
5. கார்ப்பரேட் ஃபிக்சட் டெபாசிட்டுகள்:
நிறுவனங்களால் வழங்கப்படும் கார்ப்பரேட் ஃபிக்சட் டெபாசிட்டுகள், வங்கி ஃபிக்சட் டெபாசிட்டுகளை விட அதிக வட்டி விகிதங்களை வழங்கக்கூடும். ஆனால், இதற்குக் DICGC இன்சூரன்ஸ் பாதுகாப்பு இல்லாததால் இதில் அதிக கிரெடிட் ரிஸ்க் உள்ளது. மேலும், இவை கடுமையான லாக்-இன் காலங்களையும் குறைந்த லிக்விடிட்டியையும் கொண்டிருக்கலாம். கார்ப்பரேட் ஃபிக்சட் டெபாசிட்டுகளில் முதலீடு செய்வதற்கு முன் அந்த நிறுவனத்தின் கிரெடிட் ரேட்டிங்கை கவனமாக ஆராய வேண்டும்.
6. அரசு பாண்டுகள்:
அரசின் ஆதரவைக் கொண்ட இந்த பாண்டுகள், நிலையான வருமானத்தை ஈட்டுவதற்கான பாதுகாப்பான மற்றும் கணிக்கக்கூடிய ஒரு வழியாகும். நிலையான வருமானத்தை எதிர்பார்க்கும் மற்றும் ரிஸ்க் எடுக்க விரும்பாத முதலீட்டாளர்களுக்கு இது ஒரு சிறந்த தேர்வாக இருக்கும். சில்லறை முதலீட்டாளர்கள் இப்போது இதனை நேரடியாக ஆர்பிஐ ரீடெய்ல் டைரக்ட் போர்டல் மூலமாக வாங்கலாம்.
7. ரெக்கரிங் டெபாசிட்டுகள்:
ரெக்கரிங் டெபாசிட்டுகள் (RDs) ஒரு குறிப்பிட்ட தொகையைச் சீரான கால இடைவெளியில் முதலீடு செய்ய உங்களை அனுமதிக்கின்றன, இது ஒரு முறையான சேமிப்புப் பழக்கத்தையும், ஒழுக்கத்தையும் உருவாக்குகிறது. இவை பெரும்பாலும் சாதாரண ஃபிக்சட் டெபாசிட்டுகளுக்கு இணையான வட்டி விகிதங்களையே வழங்குகின்றன. காலப்போக்கில் ஒரு பெரிய தொகையைச் சேமிக்க இது ஒரு நல்ல தேர்வாக இருக்கும்.
8. பங்குச் சந்தை
பங்குச் சந்தையில் முதலீட்டாளர்கள் பொதுப்பட்டியலில் உள்ள நிறுவனங்களின் பங்குகளை வாங்கவும் விற்கவும் முடியும். பங்குகளின் மதிப்பை ஏராளமான காரணிகள் பாதிக்கின்றன; எனவே குறிப்பிட்ட பங்குகளில் முதலீடு செய்வதற்கு விரிவான ஆராய்ச்சியும் மதிப்பீடும் தேவைப்படுகிறது. இருப்பினும், அதிக சந்தை ரிஸ்க்கை சரியாக நிர்வகித்தால், புத்திசாலித்தனமான பங்குத் தேர்வு நீண்ட காலத்தில் மிகப்பெரிய நிதி வளர்ச்சியைத் தரும்.
9. மியூச்சுவல் ஃபண்டுகள்
மியூச்சுவல் ஃபண்டுகள் பல முதலீட்டாளர்களின் மூலதனத்தை ஒன்றாகத் திரட்டி, அதை கமாடிட்டிகள், ஈக்விட்டிகள் மற்றும் பாண்டுகள் உள்ளிட்ட பல்வேறு சொத்துக்களில் முதலீடு செய்கின்றன. இந்த பன்முகத்தன்மை ரிஸ்க்கைக் குறைக்க உதவுகிறது. பங்குச் சந்தைக்குப் புதியவர்களுக்கும் அல்லது தங்கள் போர்ட்ஃபோலியோவை தாங்களாகவே நிர்வகிக்க நேரமும், நிபுணத்துவமும் இல்லாதவர்களுக்கும் இது ஒரு நல்ல தேர்வாக இருக்கும்.மியூச்சுவல் ஃபண்டுகள் வெவ்வேறு ரிஸ்க் சுயவிவரங்கள் மற்றும் நிதி இலக்குகளுக்கு ஏற்ப பல்வேறு முதலீட்டு விருப்பங்களை வழங்குகின்றன. இந்த பிரிவில் மேலே குறிப்பிடப்பட்ட ஈக்விட்டி, டெப்ட் மற்றும் லிக்விட் ஃபண்டுகள் போன்ற பல விருப்பங்கள் அடங்கும்.
10. ஐபிஓக்கள்
இனிஷியல் பப்ளிக் ஆபரிங்ஸ் (IPOs) முதலீட்டாளர்களுக்குப் பங்குச் சந்தையில் புதிதாகக் கால்பதிக்கும் நிறுவனங்களில் முதலீடு செய்யும் வாய்ப்பை வழங்குகிறது. இந்த நிறுவனங்கள் நல்ல நிறுவப்பட்ட நிறுவனங்கள் முதல் ஆரம்பக் கட்ட வளர்ச்சி நிறுவனங்கள் வரை எதுவாகவும் இருக்கலாம். எனவே, ஐபிஓக்கள் வளர்ந்து வரும் நிறுவனங்களில் பங்குகளைப் பெறுவதற்கான ஒரு நல்ல வாய்ப்பாகும்.ஆனால், சந்தையில் பட்டியலிடப்படும் விலை ஏற்ற இறக்கங்களுக்கு உள்ளாகலாம் மற்றும் எதிர்கால மதிப்புடன் ஒப்பிடும்போது இது எப்போதும் "குறைந்த நுழைவுச் செலவில்" இருக்கும் என்று கூற முடியாது என்பதை நினைவில் கொள்ள வேண்டும்.
முடிவுரை
பல்வேறு முதலீட்டு வாய்ப்புகளை ஆராய்ந்து பார்க்கும்போது, ஃபிக்சட் டெபாசிட்டுகள் (FDs) அவற்றின் உத்தரவாதமான வருமானம் மற்றும் பாதுகாப்பிற்காக இன்னும் ஒரு நம்பகமான தேர்வாகவே நீடிக்கின்றன. இருப்பினும், அவற்றின் குறைந்த வளர்ச்சித் திறன் மற்றும் வரி விதிக்கப்படும் வட்டி வருமானம் ஆகியவை அனைத்து முதலீட்டாளர்களுக்கும் பொருந்தாமல் போகலாம்.மாற்று வழிகளைத் தேடுபவர்களுக்கு, தேர்ந்தெடுப்பதற்குப் பலதரப்பட்ட ஆப்ஷன்கள் உள்ளன. வழக்கமான வருமானம், மூலதனப் பாதுகாப்பு அல்லது மூலதன வளர்ச்சி என ஒவ்வொரு விருப்பமும் குறிப்பிட்ட நிதி இலக்குகளைப் பூர்த்தி செய்கின்றன. சிறந்த தீர்வைத் தேர்ந்தெடுக்க, உங்கள் முதலீட்டுக் காலம், ரிஸ்க் எடுக்கும் திறன் மற்றும் ஒவ்வொரு சொத்தின் வரிக்கு பின்னைய வருவாய் ஆகியவற்றை நீங்கள் மதிப்பீடு செய்ய வேண்டும்.
