சில்லறை வங்கிச் சேவை என்றால் என்ன?

சில்லறை வங்கிகள் பொதுமக்களின் தேவைகளைப் பூர்த்தி செய்கின்றன மற்றும் தெளிவான வங்கிச் சேவையை வழங்கி வருகின்றன. எனவே, வாடிக்கையாளர்கள் தங்களை எளிதாக அணுக வேண்டும் என்பதற்காக நகரத்தின் பல்வேறு பகுதிகளில் தங்களது கிளைகளை அமைத்துள்ளன. வங்கிகள் வாடிக்கையாளர்களுக்கு வீட்டுக் கடன், வாகனக் கடன், தனிநபர் கடன் போன்ற கடன் வசதிகளை வழங்கும்போது, சந்தையில் பணப்புழக்கம் அதிகரிக்கிறது. வாடிக்கையாளர்களின் கைக்குப் பணம் வரும்போது, அவர்கள் பொருட்களை வாங்கத் தொடங்குவதால் நிறுவனங்களின் உற்பத்தி அதிகரித்து வேலைவாய்ப்புகள் உருவாகின்றன. இது நாட்டின் பொருளாதார வளர்ச்சிக்கு வழிவகுக்கிறது.

வழக்கமாக சில்லறை வங்கிகள் வாடிக்கையாளர்களுக்கு வீட்டுக் கடன்கள், கிரெடிட் கார்டுகள், வாகனக் கடன்கள் மற்றும் அடமானக் கடன்கள் போன்ற கடன்களை வழங்குகின்றன. இந்த வங்கிகள் தங்கள் வாடிக்கையாளர்களிடமிருந்து வாங்கும் டெபாசிட் பணத்தைத் தான், மற்றவர்களுக்குக் கடனாக வழங்கி வட்டி ஈட்டுகின்றன.

முக்கிய அம்சங்கள்:

சில்லறை வங்கிகள் ஒவ்வொரு தனிநபரின் வருமானம் மற்றும் அவர்களின் தேவைக்கேற்ப சிறந்த சேவைகளை வடிவமைத்து வழங்குகின்றன.

சில்லறை வங்கிச் சேவையின் முக்கிய பணிகளாவது, வாடிக்கையாளர்களின் டெபாசிட்களைப் பாதுகாப்பாக வைத்திருப்பது மற்றும் அவர்களுக்கு கிரெடிட் கார்டுகள், கடன்கள் போன்ற கடன் வசதிகளை வழங்குவது ஆகியவை ஆகும்.

வங்கிகள் இரண்டு வழிகளில் வருவாய் ஈட்டுகின்றன. அதில் ஒன்று வட்டி வருமானம் அதாவது, அவர்கள் வாடிக்கையாளர்களுக்கு வழங்கும் கடன்களுக்கான வட்டிக்கும், டெபாசிட்டுகளுக்கு வழங்கும் வட்டிக்கும் இடையே உள்ள வித்தியாசம். மற்றொன்று முதலீடுகள், காப்பீடு மற்றும் இதர நிதி தயாரிப்புகள் மூலம் கிடைக்கும் வட்டி அல்லாத வருமானம் ஆகியவாதியாகும்.

பெரிய வங்கிகள், சமூக வங்கிகள், ஆன்லைன் வங்கிகள், மண்டல ஊரக வங்கிகள் மற்றும் அஞ்சல் நிலையங்கள் ஆகியவை சில்லறை வங்கிச் சேவைகளை வழங்கி வருகின்றன.

சில்லறை வங்கிச் சேவையின் செயல்பாடுகளைப் புரிந்துகொள்ளுதல்:

சில்லறை வங்கிச் சேவையானது தங்கள் வாடிக்கையாளர்களின் அன்றாடப் பணப் பரிவர்த்தனைகளை மேற்கொள்ள உதவுகின்றன. மேலும், இந்த வங்கிகள் வாடிக்கையாளர்களின் பணத்தைப் பாதுகாப்பாக வைக்கின்றன, தனிநபர் கடன்களை வழங்குகின்றன மற்றும் மியூச்சுவல் ஃபண்டுகள் அல்லது ஃபிக்ஸ்ட் டெபாசிட்டுகள் போன்ற முதலீட்டு வாய்ப்புகளை வாடிக்கையாளர்களுக்குக் கொண்டு சேர்க்கின்றன.

நெட் பேங்கிங் மூலம் வாடிக்கையாளர்களும், சிறு வணிகர்களும் தங்கள் இடத்திலிருந்தே மிக எளிதாகப் பணப் பரிமாற்றம் செய்ய முடிகிறது. பணப் பரிமாற்றம் மட்டுமின்றி, கிரெடிட் கார்டு பில்கள் கட்டுவது, மொபைல் ரீசார்ஜ், காப்பீட்டுத் தொகை செலுத்துவது போன்ற பல நிதிச் செயல்பாடுகளை ஒரே இடத்தில், சில கிளிக்குகளில் செய்ய முடிகிறது.

சில்லறை வங்கிகள் எவ்வாறு வருவாய் ஈட்டுகின்றன?

சில்லறை வங்கிகள் முதலீட்டு வங்கி நிறுவனங்களைப் போல வருவாய் ஈட்டுவதில்லை. இந்த வங்கிகள் வெவ்வேறு வட்டி மற்றும் வட்டி அல்லாத வருவாயிலிருந்து வருமானத்தை ஈட்டுகின்றன. வட்டி வரம்பு என்பது அவர்கள் கடன்களுக்குப் பெறும் வட்டிக்கும், டெபாசிட்களுக்குச் செலுத்தும் வட்டிக்கும் இடையே உள்ள வித்தியாசமாகும்.

கடன்களுக்கான செயலாக்கக் கட்டணம் மற்றும் கணக்கு சார்ந்த கட்டணங்கள் போன்ற வட்டி அல்லாத வருமானமும், காப்பீடு, மியூச்சுவல் ஃபண்டுகள், கிரெடிட் கார்டுகள் போன்றவற்றை குறுக்கு-விற்பனை செய்வதன் மூலம் கிடைக்கும் லாபமும் வங்கியை நிதி ரீதியாகத் தடையின்றி இயங்க வைப்பதுடன், வாடிக்கையாளர்களுக்கு வசதியான மற்றும் விரிவான வங்கிச் சேவைகளையும் வழங்குகின்றன.

சில்லறை வங்கிகளின் வகைகள்:

பொதுத்துறை வங்கிகள்

பொதுத்துறை வங்கிகளில் இந்திய அரசாங்கம் (50%க்கும் அதிகமான) பங்குகளைத் தனது வசம் வைத்துள்ளது. எனவே, இவை அரசுக்குச் சொந்தமான வங்கிகள் ஆகும். இந்தியக் குடும்பங்களிடையே மிகவும் பிரபலமான இந்த பொதுத்துறை வங்கிகள் இந்தியாவின் மூலை முடுக்கெல்லாம், குறிப்பாக தனியார் வங்கிகள் செல்ல தயங்கும் தொலைதூரக் கிராமப்புறங்களிலும் தங்களது கிளைகளையும் ஏடிஎம்களையும் கொண்டுள்ளன. எனவே மக்கள் தங்களின் பாதுகாப்பு மற்றும் அரசாங்கப் பின்னணிக்காக இவை பெரும்பாலும் மக்களால் விரும்பப்படுகின்றன.

எடுத்துக்காட்டுகள்: ஸ்டேட் பேங்க் ஆஃப் இந்தியா, பஞ்சாப் நேஷனல் வங்கி, பேங்க் ஆஃப் பரோடா, கனரா வங்கி.

தனியார் துறை வங்கிகள்

இந்த வங்கிகள் அரசாங்கத்திற்குப் பதிலாக தனிநபர்கள் அல்லது தனியார் நிறுவனங்களால் சொந்தமாக்கப்பட்டு, நிர்வகிக்கப்பட்டு, கட்டுப்படுத்தப்படுகின்றன. பொதுத்துறை வங்கிகளைப் போலவே இவைகளும் இந்திய ரிசர்வ் வங்கி விதிகளையே பின்பற்றினாலும், சிறந்த வாடிக்கையாளர் சேவை, விரைவான கடன் வழங்கல் மூலம் டிஜிட்டல் வங்கிச் சேவையில் முன்னணியில் திகழ்கின்றன.

எடுத்துக்காட்டுகள்: ஹெச்டிஎப்சி வங்கி, ஐசிஐசிஐ வங்கி, ஆக்சிஸ் வங்கி, கோடக் மஹிந்திரா வங்கி.

ஆன்லைன்/நியோபேங்க்கள்

இந்த நிதித் தளங்களுக்கு எந்தவொருக் கிளையோ அல்லது நேரில் செல்லும் வசதியோ கிடையாது. இவை முற்றிலும் ஆன்லைனில் இயங்குகின்றன மற்றும் பாரம்பரிய வங்கிகளுடன் கூட்டாண்மை வைத்தே தங்கள் சேவைகளை வழங்குகின்றன. குறைந்தபட்சக் கட்டணங்கள், செலவுகளைக் கண்காணித்தல் மற்றும் உடனடி கணக்குத் தொடங்குதல் போன்ற அம்சங்களுடன் தடையற்ற, தொழில்நுட்ப அடிப்படையிலான சேவையை வழங்கி வருகின்றன.

எடுத்துக்காட்டுகள்: ஜூபிடர் (ஃபெடரல் வங்கி உடன் கூட்டாண்மை), Fi Money, Niyo, RazorpayX.

மண்டல ஊரக வங்கிகள்:

கிராமப்புறங்களில் வங்கிச் சேவைகள் இல்லாத அல்லது போதிய சேவைகள் கிடைக்காத மக்களுக்காகவே இந்த வங்கிகள் பிரத்யேகமாக உருவாக்கப்பட்டன. மத்திய அரசு, மாநில அரசு மற்றும் ஒரு ஸ்பான்சர் வங்கி ஆகியவற்றின் கூட்டுப் பங்களிப்பில் இயங்குகின்றன. இந்தியாவின் கிராமப்புற மேம்பாட்டிற்காகவும், விவசாயத் துறையை ஊக்குவிப்பதற்காகவும் இந்த வங்கிகள் முக்கியப் பங்கு வகிக்கின்றன.

எடுத்துக்காட்டுகள்: கேரளா கிராமின் வங்கி, பிரதமா UP கிராமின் வங்கி, ஆந்திர பிரதேச கிராமிய விகாஸ் வங்கி.

கூட்டுறவு வங்கிகள்:

இந்த வங்கிகள் பங்குகளின் எண்ணிக்கையின் அடிப்படையில் இயங்காமல், "ஒரு நபருக்கு ஒரு வாக்கு" என்ற ஜனநாயகக் கொள்கையின் படியே இயங்குகின்றன. இதன் உறுப்பினர்களே வங்கியின் உரிமையாளர்களாகவும், வாடிக்கையாளர்களாகவும் இருக்கிறார்கள். பெருநிறுவனங்களுக்குக் கடன் வழங்குவதை விட, நகர்ப்புற மற்றும் கிராமப்புறங்களில் உள்ள சிறு வணிகங்களுக்கும், உள்ளூர் சமூகங்களுக்கும் எளிய முறையில் கடனுதவி வழங்குவதே இவர்களின் முதன்மை நோக்கமாகும்.

எடுத்துக்காட்டுகள்: சரஸ்வத் கூட்டுறவு வங்கி, காஸ்மோஸ் கூட்டுறவு வங்கி, ஷாம்ராவ் வித்தல் கூட்டுறவு வங்கி.

சில்லறை வங்கிச் சேவையின் முக்கிய நோக்கங்கள்:

வாடிக்கையாளர்களுக்கு ஒரே இடத்தில் அனைத்துச் சேவைகளும் கிடைக்கும் அனுபவத்தை வழங்குதல்:

சில்லறை வங்கிச் சேவையானது பரந்த அளவிலான வாடிக்கையாளர்களுக்கு முழுமையான நிதிச் சேவைகளை ஒரே இடத்தில் வழங்க முயற்சிக்கிறது. டெபாசிட்களை ஏற்றுக்கொள்வது, கிரெடிட் கார்டு வழங்குதல், ஆன்லைன் பேங்கிங், டெபிட் கார்டு, மாஸ்டர்கார்டு மற்றும் பல்வேறு சேவைகள் இதில் அடங்கும். இந்தச் சேவைகளை ஒரே இடத்தில் ஒருங்கிணைப்பது வாடிக்கையாளருக்குக் கூடுதல் வசதியை அளிக்கிறது.

பொருளாதாரத்தைத் தூண்டுதல்:

மக்களிடையே பணப் புழக்கத்தை அதிகரிப்பதன் மூலம் பொருளாதாரத்தைத் தூண்டுகிறது, மேலும் இது நாட்டின் ஒட்டுமொத்த வளர்ச்சி மற்றும் மேம்பாட்டிற்கு வழிவகுக்கிறது. அதிகளவிலான நிதிச் சேவைகள் கிடைப்பது, குடிமக்களின் வேலைவாய்ப்புத் திறன் அதிகரிப்பது, புதிய திறன்களைக் கற்றுக்கொள்வது மற்றும் உயர்கல்வி வாய்ப்புகளைப் பெறுவது ஆகியவற்றில் தாக்கத்தை ஏற்படுத்துகிறது.

சந்தை பணப்புழக்கத்தை மேம்படுத்துதல்:

சில்லறை வங்கிச் சேவையின் மற்றொரு முக்கிய நோக்கம் சந்தை பணப்புழக்கத்தை அதிகரிப்பதாகும். இது மக்களுக்குக் கடன் வசதிகளை வழங்குகிறது, இதனால் அவர்கள் விலையுயர்ந்த பொருட்களை எளிதாக வாங்க முடிகிறது. சந்தையில் பணப்புழக்கத்தை அதிகரிப்பதன் மூலம், நாட்டில் அதிக வேலை வாய்ப்புகள் உருவாக வழிவகுக்கிறது.

நியாயமான விகிதத்தில் கடன் வழங்குதல்:

மற்ற நிதி நிறுவனங்களுடன் ஒப்பிடும்போது, மக்கள் சில்லறை வங்கிச் சேவை மூலம் குறைந்த செலவில் கடனைப் பெற முடியும். இது பொருளாதாரக் காரணங்களுக்கு ஏற்பக் கடன் வாங்கும் வட்டி விகிதத்தை மாற்றியமைக்கிறது. பணவீக்கக் காலங்களில் வட்டி விகிதங்கள் அதிகரிக்கப்பட்டு, பொருளாதாரம் மந்தநிலைக்குச் செல்லும்போது வட்டி விகிதங்கள் குறைக்கப்படுகின்றன.

சில்லறை வங்கிச் சேவையின் செயல்பாடுகள்

ரொக்க டெபாசிட்களுக்குப் பாதுகாப்பான இடத்தை வழங்குதல்

வாடிக்கையாளர்கள் தங்கள் பணம் மற்றும் பிற முக்கியமான நிதி சார்ந்த பொருட்களைச் சில்லறை வங்கியில் டெபாசிட் செய்யலாம், இது ஒரு பாதுகாப்பான இடமாகும். வங்கிகள் அதிக லாப விகிதத்தை உறுதியளிப்பதன் மூலமும், முதலீட்டின் பாதுகாப்பை உறுதி செய்வதன் மூலமும் வாடிக்கையாளர்கள் பணத்தை டெபாசிட் செய்ய ஊக்குவிக்கின்றன.

செலவினங்களுக்கான கடன்களை வழங்குதல்

வங்கிகள் தங்கள் வாடிக்கையாளர்களின் கிரெடிட் ஸ்கோர்களைப் பொறுத்து அவர்களுக்குக் கடன்களை வழங்குகின்றன. சில்லறை வங்கிகள் வீட்டுக் கடன்கள், வாகனக் கடன்கள், அடமானக் கடன்கள் மற்றும் பல்வேறு தயாரிப்புகள் உள்ளிட்ட பல வகையான கடன்களை வழங்குவதன் மூலம் வாடிக்கையாளர்களின் செலவினங்களை எளிதாக்குகின்றன.

நிதி மேலாண்மை

வாடிக்கையாளர்கள் சில்லறை வங்கிச் சேவை மூலம் பல்வேறு வங்கி கார்டுகள் மற்றும் ஆன்லைன் ஆப் சேவைகளைப் பயன்படுத்தித் தங்களின் பணத்தை நிர்வகிக்கின்றன. ஆன்லைன் கட்டண முறைகளைப் பயன்படுத்தி அவர்கள் எந்த நேரத்திலும் பரிவர்த்தனைகளைச் செய்யத் தங்களது பணத்தை எளிதாகப் பயன்படுத்தலாம்.

பொருளாதாரத்தில் பணப் புழக்கத்தை அதிகரிக்கிறது

ஒரு வாடிக்கையாளர் ஒரு வங்கியில் பெறும் கடன், மற்றொரு வங்கியில் டெபாசிட்டாக மாறுகிறது. இந்த டெபாசிட்டானது புதிய வாடிக்கையாளருக்கு கடன்களை வழங்கப் பயன்படுத்தப்படுகிறது. இந்த வழியில், கடன் மற்றும் டெபாசிட் சுழற்சி தொடர்கிறது. இதன் மூலம், ஆரம்பத்தில் இருந்த ஒரு சிறிய தொகை, பொருளாதாரத்தில் பல மடங்கு பெரிய பணப் புழக்கமாக உருவெடுக்கிறது.

பொருளாதார வளர்ச்சிக்கு உதவுகிறது

நாட்டின் பொருளாதார வளர்ச்சியில் சில்லறை வங்கி முக்கியப் பங்கு வகிக்கிறது. இது தனிநபர்களுக்குக் குறைந்த வட்டி விகிதத்தில் கடன்களை வழங்குவதன் மூலம் சந்தையில் சிறந்த பணப் புழக்கத்தை அதிகரிக்கிறது. மக்களிடம் போதிய பணம் இருக்கும்போது, அவர்கள் பொருட்களை வாங்கத் தொடங்குவதால் நிறுவனங்களின் உற்பத்தி அதிகரித்து வேலைவாய்ப்புகள் உருவாகின்றன. இது நாட்டின் பொருளாதார வளர்ச்சிக்கு வழிவகுக்கிறது.

சில்லறை வங்கிச் சேவைகள் பரிணாம வளர்ச்சி அடைந்துள்ளன

இன்றைய வங்கிகள் ஆன்லைன் மற்றும் மொபைல் பேங்கிங் சேவை விருப்பங்களை வழங்குகின்றன, இது வாடிக்கையாளர்கள் தங்கள் இடத்திலிருந்தே கணக்குகளை இயக்கவும், பணப் பரிமாற்றம் செய்யவும் மற்றும் கடன்களைப் பெறவும் அனுமதிக்கிறது. சில்லறை வங்கிச் சேவையின் வளர்ச்சி என்பது நிதித் துறையில் மிகவும் அணுகக்கூடியதாகவும், திறமையாகவும், வாடிக்கையாளர்களை மையமாகக் கொண்டதாகவும் மாறுவதற்கான மாற்றத்தின் அறிகுறியாகும்.

சில்லறை மற்றும் கார்ப்பரேட் வங்கிச் சேவைகளின் ஒப்பீடு

சில்லறை வங்கிகள் தனிநபர்கள் மீது கவனம் செலுத்தும் வேளையில், கார்ப்பரேட் வங்கிகள் பெரிய வணிகங்களுக்கும், அரசு நிறுவனங்களுக்கும் சேவைகளை வழங்கி வருகின்றன. சில்லறை வங்கிகளால் வழங்கப்படும் பொதுவான சேவைகளில் டெபாசிட் கணக்குகள், தனிநபர் கடன்கள், அடமானக் கடன்கள் மற்றும் கிரெடிட் கார்டுகள் ஆகியவை அடங்கும். மறுபுறம், கார்ப்பரேட் வங்கிகள் பிரத்யேகச் சேவைகளை வழங்கி வருகின்றன, மேலும் பெரிய அளவிலான வணிகக் கடன்கள் மற்றும் அந்நிய செலாவணி ஆகியவற்றை உள்ளடக்கியுள்ளன.

முடிவுரை

சில்லறை வங்கிச் சேவை என்பது தனிநபர்களுக்குக் கடன் வழங்குவது, சேமிப்புக் கணக்குகளை நிர்வகிப்பது போன்ற பணிகளின் மூலம் நாட்டின் பொருளாதாரத்தை அடித்தள மட்டத்தில் இருந்து வலுப்படுத்துகிறது. தனிநபர் மற்றும் நாட்டின் பொருளாதார வளர்ச்சிக்கு இது மிக முக்கியமானது. சில்லறை வங்கிச் சேவையானது தனது வாடிக்கையாளர்களுக்குத் தடையற்ற மற்றும் பாதுகாப்பான அனுபவத்தைத் தொடர்ச்சியாக வழங்கி வருகிறது. சில்லறை வங்கிகளானது வாடிக்கையாளர்கள் தங்களின் பணத்தை திறம்படக் கட்டுப்படுத்தவும், அவர்களின் நிதி எதிர்காலத்தைப் பாதுகாக்கவும் உதவுகின்றன.