• நிறுவன முதலீட்டாளர்கள் என்பது வங்கிகள் மற்றும் பரஸ்பர நிதிகள் (மியூச்சுவல் ஃபண்ட்ஸ்) போன்ற பெரிய அமைப்புகளாகும், இவை அதிக அளவு பணத்தை முதலீடு செய்கின்றன. 

• சில்லறை முதலீட்டாளர்கள் என்பது தங்கள் சொந்த சேமிப்பை முதலீடு செய்யும் தனிநபர்கள். பெரும்பாலான சந்தர்ப்பங்களில் அவர்கள் சிறிய அளவிலேயே முதலீடு செய்கிறார்கள். 

• டி.ஐ.ஐ-க்கள் (இந்திய நிறுவனங்கள்) மற்றும் எஃப்.ஐ.ஐ-க்கள் (வெளிநாட்டு முதலீட்டாளர்கள்) ஆகிய இரண்டும் இந்திய பங்குச் சந்தையை முக்கியமாக பாதிக்கின்றன. 

• நிறுவன முதலீட்டாளர்கள், பெரிய அளவிலான செயல்பாடுகளின் பயனைப் (எகானமீஸ் ஆஃப் ஸ்கேல்) பெற்று, பரிவர்த்தனை செலவுகள் மற்றும் தரகு கட்டணங்களை கணிசமாகக் குறைக்கிறார்கள். 

நிறுவன முதலீட்டாளர்கள் (இன்ஸ்டிடியூஷனல் இன்வெஸ்டர்ஸ்)

இவர்கள் பெரிய அளவில் பத்திரங்களை (செக்யூரிட்டீஸ்) வர்த்தகம் செய்யும் அமைப்புகள். இவர்கள் வழக்கமாக மற்ற முதலீட்டாளர்களின் சார்பாக பணத்தை நிர்வகிக்கும் நிறுவனங்கள். ஓய்வூதிய நிதிகள், பரஸ்பர நிதிகள் , காப்பீட்டு நிறுவனங்கள், அறக்கட்டளைகள் மற்றும் ஹெட்ஜ் நிதிகள் போன்றவை நிறுவன முதலீட்டாளர்களுக்கு எடுத்துக்காட்டுகளாகும்.

சில்லறை முதலீட்டாளர்களை விட நிறுவன முதலீட்டாளர்கள் பெரும்பாலும் அனுபவிக்கும் சில நன்மைகள் பின்வருமாறு:

• நிறுவன முதலீட்டாளர்கள் பல நபர்களைக் கொண்ட அமைப்புகள் என்பதால், அவர்கள் விரிவான ஆராய்ச்சி மற்றும் சிக்கலான முதலீட்டு உத்திகளை மேற்கொள்ள முடியும். எனவே, சந்தையை மதிப்பிடுவதில் அவர்கள் வெற்றிபெற அதிக வாய்ப்புள்ளது.
• பெரிய அளவிலான செயல்பாடுகளால் (எகானமீஸ் ஆஃப் ஸ்கேல்), நிறுவனங்கள் குறைந்த பரிவர்த்தனை செலவுகளை அனுபவிக்கின்றன.
• சந்தை விலைகள் மற்றும் போக்குகளைத் தீர்மானிக்கும் திறன் நிறுவன முதலீட்டாளர்களுக்கு அதிகம். இது அவர்களின் முதலீடுகளின் அளவு மற்றும் அவர்களுக்குக் கிடைக்கும் வளங்களால் ஏற்படுகிறது.

சில்லறை முதலீட்டாளர்கள் (ரீடெயில் இன்வெஸ்டர்ஸ்)

நிறுவன முதலீட்டாளர்களுக்கு மாறாக, சில்லறை முதலீட்டாளர்கள் தங்கள் தனிப்பட்ட கணக்குகளுக்காக பங்குகளை வாங்கும் மற்றும் விற்கும் தனிநபர்கள் ஆவர். இவர்கள் மிகச் சிறிய தொகையையே முதலீடு செய்கிறார்கள் மற்றும் பெரும்பாலும் ஓய்வூதியத்திற்காகச் சேமித்தல் அல்லது தனிப்பட்ட நிதி இலக்குகளை அடைதல் போன்ற வெவ்வேறு நோக்கங்களால் வழிநடத்தப்படுகிறார்கள்.

சில்லறை முதலீட்டாளர்கள் தங்கள் சொந்தப் பணத்தை நிர்வகிக்கிறார்கள். அவர்கள் தங்கள் செயல்பாட்டிற்காக வேறு எந்த முதலீட்டாளருக்கும் பதிலளிக்க வேண்டியதில்லை. வரிகளைச் செலுத்திய பிறகு, லாபம் மற்றும் நஷ்டம் முழுவதும் முதலீட்டாளருடையதே. அதே சமயம், சில்லறை முதலீட்டாளர்கள் தனிப்பட்ட அளவில் அதிக பொறுப்புகளை ஏற்க வேண்டியிருக்கும்.

அவர்கள் வர்த்தகத்திற்காக தரகு கணக்குகள் , ஓய்வூதிய கணக்குகள் அல்லது பிற முதலீட்டு முறைகளைப் பயன்படுத்தலாம். அவர்கள் தங்கள் முதலீடுகளுக்காக முழு-சேவை அல்லது தள்ளுபடி தரகர்களைப் பயன்படுத்தலாம்.

நிறுவன முதலீட்டாளர்களுடன் ஒப்பிடும்போது, சில்லறை முதலீட்டாளர்கள் பொதுவாக அதிக பரிவர்த்தனை செலவுகளை எதிர்கொள்கின்றனர். அவர்களுக்குத் தகவல்களைப் பெறுவதில் உள்ள குறைபாடுகள் மற்றும் வளங்களின் பற்றாக்குறை காரணமாக, விரிவான பகுப்பாய்வை மேற்கொள்வது கடினமாக இருக்கலாம். கூடுதலாக, அவர்களின் வர்த்தகங்கள் சிறிய அளவில் இருப்பதால், சந்தை விலைகளில் அவர்களுக்கு மிகக் குறைந்த செல்வாக்கே உள்ளது.

இருப்பினும், கடந்த சில ஆண்டுகளில், அதிகரித்த நிதி விழிப்புணர்வு மற்றும் டிமேட் கணக்குகளின் வருகை, இந்திய பங்கு மற்றும் கடன் சந்தைகளில் அதிக சில்லறை முதலீட்டாளர்கள் பங்கேற்க வழிவகுத்துள்ளது. நன்கு அறிந்த சில்லறை முதலீட்டாளர்களைக் கொண்டிருப்பது, அதிக வெற்றி வாய்ப்புள்ள நிறுவனங்களுக்கு அதிக மூலதனம் செல்வதை உறுதி செய்கிறது.

நிறுவன முதலீட்டாளர்கள் மற்றும் சில்லறை முதலீட்டாளர்களுக்கு இடையிலான வேறுபாடுகள்

தலைப்பு	நிறுவன முதலீட்டாளர்கள்	சில்லறை முதலீட்டாளர்கள்
முதலீட்டின் அளவு	நிறுவன முதலீட்டாளர்கள் பெரிய அளவில் வர்த்தகம் செய்கிறார்கள், இது பெரும்பாலும் கோடிக்கணக்கான ரூபாய்களை உள்ளடக்கியது.	சில்லறை முதலீட்டாளர்கள் பொதுவாக ஆயிரக்கணக்கான அல்லது லட்சக்கணக்கான ரூபாய்களை முதலீடு செய்கிறார்கள்.
பொதுவான கொள்முதல்	இவர்கள் பெரும்பாலும் மொத்தமாக   (ப்ளாக் டிரேட்ஸ்), அதாவது ஒரே நேரத்தில் 10,000 பங்குகள் என வாங்குகிறார்கள்.	இவர்கள் பெரும்பாலும் 100 பங்குகள் என்ற அளவில் (ரவுண்ட் லாட்ஸ்) பங்குகளை வாங்குகிறார்கள்.
தகவலுக்கான அணுகல்	சில்லறை முதலீட்டாளர்களை விட, நிறுவன முதலீட்டாளர்கள் பெரும்பாலும் ஆழமான, சரியான நேரத்திலான மற்றும் பிரத்யேக தகவல்களைப் பெறுகிறார்கள். அவர்களிடம் பிரத்யேக ஆராய்ச்சி குழுக்கள் இருக்கலாம் மற்றும் விலையுயர்ந்த தரவு சேவைகளுக்கு சந்தா செலுத்தலாம்.	சில்லறை முதலீட்டாளர்களுக்கு தினசரி அடிப்படையில் போதுமான ஆராய்ச்சியை மேற்கொள்ள போதுமான நேரம் இருப்பதில்லை. எனவே, அவர்கள் முதலீட்டு முடிவுகளை எடுக்கும் முறைகளும் மாறுபடுகின்றன.
சந்தையில் தாக்கம்	நிறுவன முதலீட்டாளர்கள், தங்கள் பெரிய வர்த்தக அளவுகளால், சந்தையை ஒரு குறிப்பிட்ட திசையில் நகர்த்தும் திறன் கொண்டவர்கள்.	சிறிய வர்த்தக அளவுகளைக் கொண்ட சில்லறை முதலீட்டாளர்களுக்கு சந்தையில் அதிக செல்வாக்கு இருப்பதில்லை.
இடர் மேலாண்மை மற்றும் பல்வகைப்படுத்தல்	நிறுவன முதலீட்டாளர்கள் பெரும்பாலும் சிக்கலான இடர் மேலாண்மை உத்திகளைப் பயன்படுத்துகிறார்கள் மற்றும் அதிக பல்வகைப்படுத்தப்பட்ட போர்ட்ஃபோலியோக்களை உருவாக்கும் வளங்களைக் கொண்டுள்ளனர்.	சில்லறை முதலீட்டாளர்கள் அதிக அளவு பல்வகைப்படுத்தலை அடைவது சவாலானதாகக் கருதலாம்.
உணர்ச்சிகரமான வர்த்தகம்	நிறுவன முதலீட்டாளர்கள் நிதித்துறையில் அதிகக் கல்வி மற்றும் அனுபவம் கொண்டவர்கள். அவர்கள் மனித உணர்ச்சிகளால் பாதிக்கப்படாமல் முடிவெடுக்க அல்கோ-வர்த்தகத்தை பயன்படுத்துகிறார்கள்.	சில்லறை வர்த்தகர்கள் இத்தகைய அபாயகரமான வணிகத்தைக் கையாள்வதில் குறைந்த அனுபவம் கொண்டவர்கள். எனவே, அவர்கள் முதலீடு செய்யும் போது பெரும்பாலும் தங்கள் உணர்ச்சிகளுக்கு அடிபணிகிறார்கள்.

உள்நாட்டு நிறுவன முதலீட்டாளர்கள் மற்றும் வெளிநாட்டு நிறுவன முதலீட்டாளர்கள்

நிறுவன முதலீட்டாளர்கள் மேலும் இரண்டு குழுக்களாகப் பிரிக்கப்படுகிறார்கள்:

• உள்நாட்டு நிறுவன முதலீட்டாளர்கள் (டி.ஐ.ஐ)
• வெளிநாட்டு நிறுவன முதலீட்டாளர்கள் (எஃப்.ஐ.ஐ)

எஃப்.ஐ.ஐ-களில் இறையாண்மை நிதி, வெளிநாட்டு பரஸ்பர நிதிகள், பலதரப்பு அமைப்புகள் மற்றும் பிற நிதி நிறுவனங்கள் அடங்கும்.

எஃப்.ஐ.ஐ மற்றும் டி.ஐ.ஐ ஆகிய இரண்டிற்கும் அவற்றை மற்றொன்றிலிருந்து வேறுபடுத்தும் சில பண்புகள் உள்ளன:

பொருளாதார மந்தநிலையின் போது, குறுகிய கால முதலீடுகளைக் கொண்ட வெளிநாட்டு நிறுவன முதலீட்டாளர்கள், அதிக லாபம் தரும் பிற நாடுகளுக்குச் சென்றுவிடுவார்கள். இருப்பினும், டி.ஐ.ஐ-கள் நீண்டகால முதலீடுகளைக் கொண்டிருப்பதால், அவர்கள் அவ்வாறு செய்வதற்கான வாய்ப்பு குறைவு.

எஃப்.ஐ.ஐ-கள் ஒரு உள்நாட்டு நிறுவனத்தில் எவ்வளவு சதவீத பங்குகளை வைத்திருக்க முடியும் என்பதில் சில கட்டுப்பாடுகள் உள்ளன. டி.ஐ.ஐ-களுக்கு இத்தகைய மேல் வரம்புகள் இல்லை.

இந்தியப் பொருளாதாரத்தில் டி.ஐ.ஐ மற்றும் எஃப்.ஐ.ஐ ஆகிய இரண்டின் தாக்கமும் மிகப் பெரியது. இந்திய பங்குச் சந்தையில் இரண்டிற்கும் அதிகப் பங்குகள் உள்ளன. முதலீட்டு அளவில் ஏற்படும் ஏற்ற இறக்கங்கள் இந்திய பங்குச் சந்தையில் பங்கு விலைகளைத் தீவிரமாக பாதிக்கின்றன. இந்தியத் தொழில்துறைகளுக்குப் புதிய மூலதனத்தை வழங்கவும், இந்தியாவில் பங்கு விலைகள் மற்றும் குறியீடுகள் தொடர்ந்து உயரவும் டி.ஐ.ஐ மற்றும் எஃப்.ஐ.ஐ ஆகிய இருவரின் அதிகரித்த முதலீடு தேவைப்படுகிறது.

இறுதி வார்த்தைகள்

நிதிச் சந்தைகளில் ஈடுபட விரும்பும் எவருக்கும், நிறுவன மற்றும் சில்லறை முதலீட்டாளர்களுக்கு இடையிலான வேறுபாடுகளைப் புரிந்துகொள்வது அவசியம். இரு வகை முதலீட்டாளர்களும் நிதிச் சந்தைகளின் செயல்பாடு மற்றும் மேம்பாட்டில் முக்கிய பங்கு வகிக்கின்றனர்.

நீங்கள் இந்திய மூலதனச் சந்தைகளில் முதலீடு செய்ய ஆர்வமாக இருந்தால், இன்று ஏஞ்சல் ஒன் நிறுவனத்தில் டிமேட் கணக்கைத் தொடங்குங்கள்!