தமிழ்
முதலீட்டாளர்களும் பகுப்பாய்வாளர்களும் சந்தையின் நடத்தை மற்றும் பொருளாதாரப் போக்குகளைப் புரிந்துகொள்ள பல்வேறு குறிகாட்டிகளை நம்பியுள்ளனர். இவற்றில் மிகவும் பரவலாகப் பயன்படுத்தப்படுபவை பின் தங்கிய குறிகாட்டிகள் மற்றும் முன்னோடி குறிகாட்டிகள் ஆகும். இவை கடந்த கால நகர்வுகளைப் புரிந்துகொள்ளவும், எதிர்காலத்தில் ஏற்படக்கூடிய சாத்தியமான மாற்றங்களை முன்கூட்டியே கணிக்கவும் உதவுகின்றன.
முன்னோடி குறிகாட்டிகள் சாத்தியமான போக்குகளைப் பற்றிய ஆரம்பகால சமிக்ஞைகளை வழங்குகின்றன, அதே நேரத்தில் பின் தங்கிய குறிகாட்டிகள் ஏற்கனவே உருவான அமைப்புகளை உறுதிப்படுத்துகின்றன. இந்த குறிகாட்டிகள் எவ்வாறு செயல்படுகின்றன என்பதைப் புரிந்துகொள்வது சந்தைப் பங்கேற்பாளர்கள் போக்குகளை மதிப்பிடவும், மேலும் தகவலறிந்த முடிவுகளை எடுக்கவும் உதவும்.
முக்கிய அம்சங்கள்
- முன்னோடி குறிகாட்டிகள் பெரிய மாற்றங்கள் நடப்பதற்கு முன்பே எதிர்கால பொருளாதார அல்லது சந்தைப் போக்குகளைக் கணிக்க முயல்கின்றன.
- பின் தங்கிய குறிகாட்டிகள் வரலாற்றுத் தரவைப் பயன்படுத்தி, ஏற்கனவே நடந்த நகர்வுகளுக்குப் பிறகு போக்குகளை உறுதிப்படுத்துகின்றன.
- இரண்டு குறிகாட்டிகளுமே நிதிப் பகுப்பாய்வு மற்றும் வர்த்தகத்தில் சந்தை நடத்தையைப் புரிந்துகொள்ள பொதுவாகப் பயன்படுத்தப்படுகின்றன.
- முன்னோடி மற்றும் பின் தங்கிய குறிகாட்டிகளை ஒன்றாகப் பயன்படுத்துவது சந்தைப் போக்குகளைப் பற்றிய ஒரு சீரான பார்வையைக் கொடுக்க உதவுகிறது.
குறிகாட்டிகள் என்றால் என்ன?
குறிகாட்டிகள் என்பவை பொருளாதாரம், நிதி அல்லது வணிகப் போக்குகளைப் புரிந்துகொள்ளப் பயன்படும் புள்ளியியல் அளவீடுகள் ஆகும். பல்வேறு காரணிகள் சந்தை நடத்தை, பொருளாதார நடவடிக்கை அல்லது நிறுவனத்தின் செயல்பாட்டை எவ்வாறு பாதிக்கலாம் என்பதைப் புரிந்துகொள்ள இவை உதவுகின்றன. காலப்போக்கில் இந்த புள்ளிவிவரங்களைப் பகுப்பாய்வு செய்வதன் மூலம், முடிவெடுப்பவர்கள் வடிவங்களை அடையாளம் கண்டு மாறிவரும் சூழ்நிலைகளை மதிப்பிட முடியும்.
நிதி, வணிகச் செயல்பாடுகள் மற்றும் பரந்த பொருளாதாரத்தில் திட்டமிடல் மற்றும் பகுப்பாய்விற்கு குறிகாட்டிகள் தேவையான சூழலை வழங்குகின்றன. இவை பொதுவாக மூன்று வகைகளாகப் பிரிக்கப்படுகின்றன: முன்னோடி குறிகாட்டிகள், பின் தங்கிய குறிகாட்டிகள் மற்றும் உடனடி குறிகாட்டிகள் (கோயின்சிடென்ட் இண்டிகேட்டர்ஸ்). ஒன்றாக, இந்த அளவீடுகள் கடந்தகால முடிவுகளைப் புரிந்துகொள்ளவும், தற்போதைய நிலையை மதிப்பிடவும், எதிர்கால சாத்தியமான போக்குகளை எதிர்பார்க்கவும் உதவுகின்றன.
முன்னோடி குறிகாட்டிகள் (லீடிங் இண்டிகேட்டர்ஸ்)
முன்னோடி குறிகாட்டிகள் என்பவை பெரும்பாலும் போக்குகளை முன்கூட்டியே கணிக்கும் பொருளாதார புள்ளிவிவரங்கள் ஆகும். இவை பொருளாதார நடவடிக்கைகளை முன்னறிவிப்பதற்கான ஒரு வழியை வழங்குகின்றன. பரந்த பொருளாதாரம் மாறுவதற்கு முன்பே இவை வழக்கமாக மாறுகின்றன, அதாவது அவை பொருளாதார நகர்வுகளுக்கு "தலைமை தாங்குகின்றன" மற்றும் பகுப்பாய்வாளர்கள் எதிர்கால சூழ்நிலைகளை எதிர்பார்க்க உதவுகின்றன.
1, ஈட்டு வளைவுகள் (ஈல்ட் கர்வ்ஸ்): ஈட்டு வளைவுகள் ஒரே கடன் தரம் ஆனால் வெவ்வேறு முதிர்வு காலங்களைக் கொண்ட பத்திரங்களின் வட்டி விகிதங்களை ஒப்பிடுகின்றன. மேல்நோக்கி செல்லும் வளைவு பெரும்பாலும் பொருளாதார வளர்ச்சியைச் சுட்டிக்காட்டுகிறது, அதே நேரத்தில் தலைகீழான வளைவு வரலாற்று ரீதியாக பொருளாதார மந்தநிலையுடன் தொடர்புடையது.
2. புதிய வீட்டுத் தொடக்கங்கள் (நியூ ஹௌசிங் ஸ்டார்ட்ஸ்): புதிய வீட்டுத் தொடக்கங்கள், புதிதாகக் கட்டப்படும் வீடுகளுக்கான தேவை குறித்து கட்டடக் கலைஞர்களின் எதிர்பார்ப்புகளைப் பிரதிபலிக்கின்றன. அதிகரித்து வரும் வீட்டுத் தொடக்கங்கள் பெரும்பாலும் எதிர்கால வீட்டுத் தேவையின் மீதான நம்பிக்கையைக் காட்டுகின்றன.
3. கொள்முதல் மேலாளர்கள் குறியீடு (பர்சேஸிங் மேனேஜர்ஸ் இன்டெகேட் - பி.எம்.ஐ): பி.எம்.ஐ என்பது நிறுவனங்களிடம் நடத்தப்படும் கருத்துக்கணிப்புகள் மூலம் உற்பத்தி மற்றும் சேவைத் துறை நடவடிக்கைகளை அளவிடுகிறது.
- 50-க்கு மேல் இருந்தால் அது வளர்ச்சியைக் குறிக்கிறது.
- 50-க்குக் கீழ் இருந்தால் அது சுருக்கத்தைக் குறிக்கிறது.
4. பணப்புழக்கம் (மணி சப்ளை): ஒரு பொருளாதாரத்தில் சுழலும் மொத்த பணத்தின் அளவில் ஏற்படும் மாற்றங்கள் சாத்தியமான பொருளாதார வளர்ச்சி அல்லது மந்தநிலையைச் சுட்டிக்காட்டலாம்.
பின் தங்கிய குறிகாட்டிகள் (லேக்கிங் இண்டிகேட்டர்ஸ்)
பின் தங்கிய குறிகாட்டிகள் ஒரு பொருளாதார அல்லது சந்தை நிகழ்வு ஏற்கனவே நடந்த பின்னரே தெளிவாகத் தெரியும். அவை எதிர்கால போக்குகளைக் கணிக்காவிட்டாலும், ஏற்கனவே உருவாகி வரும் வடிவங்களை உறுதிப்படுத்தவும் கடந்தகால பொருளாதார செயல்பாடு பற்றிய நுண்ணறிவை வழங்கவும் உதவுகின்றன.
- காலப்போக்கில் வேலைவாயப்பின்மை போக்குகள் (அன்எம்பிளாய்மென்ட் ட்ரெண்ட்ஸ்): வேலையின்மை விகிதம் பரவலாக நம்பகமான பின் தங்கிய குறிகாட்டியாகக் கருதப்படுகிறது. வேலையின்மை தொடர்ச்சியாக பல மாதங்கள் அதிகரிக்கும் போது, அது பொதுவாக பொருளாதார நடவடிக்கை பலவீனமடைந்துள்ளதையும், பொருளாதாரத்தில் செலவினங்கள் குறையக்கூடும் என்பதையும் சுட்டிக்காட்டுகிறது.
- சமீபத்திய ஆண்டுகளில் பணவீக்கப் போக்குகள் (இன்ஃப்ளேஷன் ட்ரெண்ட்ஸ்): பணவீக்க வடிவங்கள் பொதுவாக நுகர்வோர் விலை குறியீடு (சி.பி.ஐ) போன்ற அளவீடுகள் மூலம் மதிப்பிடப்படுகின்றன. இந்த குறியீட்டில் ஏற்படும் மாற்றங்கள் விலை நிலைகளில் ஏற்படும் மாற்றங்களைப் பிரதிபலிக்கின்றன மற்றும் பரந்த பொருளாதார நகர்வுகளுக்குப் பிறகு உருவாகும் பணவீக்கப் போக்குகளை உறுதிப்படுத்த உதவுகின்றன.
முன்னோடி vs பின் தங்கிய குறிகாட்டிகள்: நன்மைகள் மற்றும் தீமைகள்
முன்னோடி குறிகாட்டிகளின் நன்மைகள்
- போக்குகள் பற்றிய ஆரம்பகால சமிகணைகள்: முன்னோடி குறிகாட்டிகள் சந்தை அல்லது பொருளாதார நகர்வுகளை நடப்பதற்கு முன்பே கண்டறிய முயல்வதன் மூலம் சாத்தியமான மாற்றங்களை முன்கூட்டியே கணிக்கப் பகுப்பாய்வாளர்களுக்கு உதவுகின்றன.
- குறுகிய கால பகுப்பாய்விற்குப் பயன்படும்: ஒரு போக்கில் நுழையும் அல்லது வெளியேறும் புள்ளிகளை ஆரம்பத்திலேயே கண்டறிவதை நம்பியிருக்கும் வர்த்தக உத்திகள் பெரும்பாலும் இந்த குறிகாட்டிகளைப் பயன்படுத்துகின்றன.
- எதிர்காலம் சார்ந்த நுண்ணறிவுகள்: வரலாற்றுத் தரவை மட்டுமே சார்ந்திருப்பதற்குப் பதிலாக, அவை எதிர்கால சந்தை சூழ்நிலைகள் பற்றிய குறிப்புகளை வழங்குகின்றன.
முன்னோடி குறிகாட்டிகளின் தீமைகள்
- தவறான சமிக்ஞைகள் வரக்கூடிய சாத்தியக்கூறு: முன்னோடி குறிகாட்டிகள் சந்தையில் ஏற்படும் மாற்றங்களுக்கு விரைவாகப் பதிலளிப்பதால், அவை சில நேரங்களில் உண்மையில் ஒரு போக்கு மாற்றத்தைத் தூண்டாத தவறான சமிக்ஞைகளை வழங்கக்கூடும்.
- அதிக ஏற்ற இறக்க உணர்திறன்: முன்னோடி குறிகாட்டிகளின் நம்பகத்தன்மை சந்தையின் திடீர் மாற்றங்களால், குறிப்பாக மிகவும் ஏற்ற இறக்கம் நிறைந்த சூழ்நிலைகளில் பாதிக்கப்படலாம்.
பின் தங்கிய குறிகாட்டிகளின் நன்மைகள்
- போக்கை உறுதிப்படுத்துதல்: ஒரு சந்தைப் போக்கு ஏற்கனவே உருவாக்கியுள்ளதா என்பதைத் தீர்மானிக்க பின் தங்கிய குறிகாட்டிகள் உதவுவதால், பிற குறிகாட்டிகளால் உருவாக்கப்படும் சமிக்ஞைகளைச் சரிபார்க்க இவை பயனுள்ளதாக இருக்கும்.
- வரலாற்றுத் தரவுகளின் அடிப்படையில் அமைந்தது: பின் தங்கிய குறிகாட்டிகள் முடிவடைந்த சந்தைத் தரவை அடிப்படையாகக் கொண்டவை என்பதால் பொதுவாக மிகவும் நிலையானதாகவும் புரிந்துகொள்ள எளிதானதாகவும் கருதப்படுகின்றன.
பின் தங்கிய குறிகாட்டிகளின் தீமைகள்
தாமதமான சமிக்ஞைகள்: பின் தங்கிய குறிகாட்டிகள் ஒரு போக்கு நடந்த பின்னரே செயல்படுவதால், கணிசமான விலை நகர்வு நடந்த பிறகே மாற்றங்களைச் சுட்டிக்காட்டக்கூடும்.
வரையறுக்கப்பட்ட கணிப்புத் திறன்: எதிர்கால சந்தை நடவடிக்கைகளைக் கணிப்பதை விட, இந்த குறிகாட்டிகள் கடந்தகால போக்குகளை உறுதிப்படுத்துவதில் மட்டுமே கவனம் செலுத்துகின்றன.
பங்குச் சந்தையில் அடிக்கடி பயன்படுத்தப்படும் பின் தங்கிய குறிகாட்டிகள்
- எக்ஸ்போனென்ஷியல் மூவிங் ஆவரேஜ் (இ.எம்.ஏ): இது சமீபத்திய அவதானிப்புகளுக்கு அதிக முக்கியத்துவம் கொடுக்கும் ஒரு கருவியாகும். அனைத்து தரவுப் புள்ளிகளுக்கும் சமமான முக்கியத்துவத்தை அளிக்கும் சிம்பிள் மூவிங் ஆவரேஜில் இருந்து இது எவ்வாறு வேறுபடுகிறது என்பது இதுவே. எந்தவொரு கால அளவிற்கும் இ.எம்.ஏ-க்களை உருவாக்க முடியும். ஒரு குறிப்பிட்ட பங்கின் இ.எம்.ஏ-வின் துல்லியத்தை மேம்படுத்த, முடிந்தவரை வரலாற்றுத் தரவைப் பயன்படுத்துவது நல்லது. நீண்ட கால இ.எம்.ஏ-க்கள் விலை மாற்றங்களுக்கு மெதுவாகவே வினையாற்றுகின்றன.
- மூவிங் ஆவரேஜ் கான்வெர்ஜென்ஸ்/டைவெர்ஜென்ஸ் (எம்.ஏ.சி.டி): முதலீட்டாளர்கள் ஒரு குறிப்பிட்ட போக்கின் காளை (புல்லிஷ்) மற்றும் கரடி (பியரிஷ்) தன்மையை அடையாளம் காண உதவும் கருவி இதுவாகும். இது இரண்டு இ.எம்.ஏ-க்களின் செயல்பாடாகும், மேலும் ஒரு போக்கின் வேகம் மற்றும் கால அளவை மற்ற விஷயங்களுடன் சேர்த்து சுட்டிக்காட்ட முடியும்.
- ஆவரேஜ் டைரக்ஷனல் இண்டெக்ஸ் (ஏ.டி.எக்ஸ்): இந்த தொழில்நுட்ப பகுப்பாய்வுக் கருவி ஒரு போக்கின் வலிமையை அளவிட உதவுகிறது. ஏ.டி.எக்ஸ் என்பது 0 முதல் 100 வரையிலான அளவில் குறிக்கப்படுகிறது.
பங்குச் சந்தையில் அடிக்கடி பயன்படுத்தப்படும் முன்னோடி குறிகாட்டிகள்
- ரிலேடிவ் ஸ்ட்ரெங்த் இண்டெக்ஸ் (ஆர்.எஸ்.ஐ): பெயர் குறிப்பிடுவது போல, ஆர்.எஸ்.ஐ என்பது ஒரு முன்னோடி குறிகாட்டியாகும், இது ஒரு பங்கு சந்தையில் எப்போது அதிகமாக விற்கப்பட்டது (ஓவர்சோல்ட்) அல்லது அதிகமாக வாங்கப்பட்டது (ஓவர்பாட்) என்பதை முதலீட்டாளர்களுக்குக் கூறுகிறது.
- ஸ்டோகாஸ்டிக் ஆஸிலேட்டர்: இந்த குறிகாட்டி ஒரு பங்கின் வரலாற்று விலை வரம்பை அதன் முடிவு விலையுடன் ஒப்பிட்டு சந்தையின் திருப்புமுனைகளைக் கணிக்கிறது.
- வில்லியம்ஸ் %ஆர்: இந்தக் கருவி தேர்ந்தெடுக்கப்பட்ட வர்த்தகக் காலத்திற்குள் (இது பெரும்பாலும் இரண்டு வாரங்களுக்குப் பதிலாக 14 காலங்களாக அமைக்கப்படுகிறது) ஒரு பங்கின் அதிகபட்ச மற்றும் குறைந்தபட்ச விலைக்கு இடையே உள்ள அருகாமையைக் குறிக்கிறது. இதன் வரம்பு 0 முதல் -100 வரை இருக்கும்.
முன்னோடி மற்றும் பின் தங்கிய குறிகாட்டிகளுக்கு இடையிலான நான்கு முக்கிய வேறுபாடுகள்
| வேறுபாடு | முன்னோடி குறிகாட்டிகள் (லீடிங் இண்டிகேட்டர்ஸ்) | பின் தங்கிய குறிகாட்டிகள் (லேக்கிங் இண்டிகேட்டர்ஸ்) |
| சமிக்ஞை நேரம் (சிக்னல் டைமிங்) | சாத்தியமான சந்தை நகர்வுகளை முன்கூட்டியே கணிக்க முயல்கின்றன. | போக்குகள் ஏற்கனவே உருவான பின்னரே அவற்றை உறுதிப்படுத்துகின்றன. |
| துல்லியம் vs கணிப்பு (அக்யூரசி vs. ப்ரெடிக்ஷன்) | எதிர்கால போக்குகளைக் கணிப்பதில் கவனம் செலுத்துகின்றன, இது சில நேரங்களில் துல்லியமற்ற சமிக்ஞைகளை உருவாக்கலாம். | பூர்த்தி செய்யப்பட்ட தரவு மற்றும் கணக்கீடுகளை நம்பியிருப்பதால் பெரும்பாலும் மிகவும் நம்பகமானதாகக் கருதப்படுகின்றன. |
| பதிலளிப்பு வேகம் (ஸ்பீட் ஆஃப் ரெஸ்பான்ஸ் ) | சந்தை மாற்றங்களுக்கு மிக விரைவாக வினையாற்றுகின்றன. | மெதுவாக வினையாற்றுகின்றன, எனவே கணிசமான விலை நகர்வுக்குப் பிறகே சமிக்ஞைகள் தோன்றும். |
| வர்த்தக பயன்பாடு (ட்ரேடிங் யூசேஜ்) | டே டிரேடிங் போன்ற குறுகிய கால வர்த்தகத்தில் பொதுவாகப் பயன்படுத்தப்படுகின்றன. | ஸ்விங் டிரேடிங் போன்ற உத்திகளில் பரந்த போக்குகளைப் பகுப்பாய்வு செய்ய பெரும்பாலும் விரும்பப்படுகின்றன. |
வணிகச் செயல்பாட்டை அளவிட நீங்கள் எந்த வகையான குறிகாட்டியைப் பயன்படுத்த வேண்டும்?
பின் தங்கிய குறிகாட்டிகளை மட்டுமே நம்பியிருப்பது ஏற்கனவே என்ன நடந்தது என்பதை விளக்க உதவுகிறது, ஆனால் எதிர்கால முடிவுகளுக்கு வரையறுக்கப்பட்ட வழிகாட்டலை மட்டுமே வழங்குகிறது. இந்த குறிகாட்டிகள் முடிவுகளை உறுதிப்படுத்துகின்றன, ஆனால் அடுத்து என்ன நடக்கக்கூடும் என்பதைக் காட்டுவதில்லை. செயல்பாட்டைப் பற்றிய தெளிவான புரிதலுக்கு, முன்னோடி மற்றும் பின் தங்கிய குறிகாட்டிகள் ஆகிய இரண்டு வகைகளுமே ஒன்றாகப் பயன்படுத்தப்பட வேண்டும்.
முன்னோடி குறிகாட்டிகள் எதிர்கால முன்னேற்றங்கள் பற்றிய சமிக்ஞைகளை வழங்குகின்றன, அதே நேரத்தில் பின் தங்கிய குறிகாட்டிகள் தற்போதைய போக்குகளை உறுதிப்படுத்துகின்றன. இரண்டு வகைகளையும் உடனடி குறிகாட்டிகளுடன் (கோயின்சிடென்ட் இண்டிகேட்டர்ஸ்) சேர்த்துப் பரிசீலிப்பது தற்போதைய நிலைமைகளைப் பற்றிய பரந்த சூழலை வழங்க முடியும். இந்த கலவையைப் பயன்படுத்துவது வணிகச் செயல்பாட்டின் மிகவும் சீரான மற்றும் நம்பகமான பார்வையை உருவாக்க உதவுகிறது.
முன்னோடி குறிகாட்டிகள் vs பின் தங்கிய குறிகாட்டிகள்: எது வெற்றி பெறுகிறது?
முன்னோடி குறிகாட்டிகள் vs பின் தங்கிய குறிகாட்டிகளை ஒப்பிடுவது பகுப்பாய்வு நோக்கத்தைப் பொறுத்தது. ஒன்றைக் குருட்டுத்தனமாக நம்பி மற்றொன்றைப் புறக்கணிப்பதை விட, இரண்டின் அனுமானங்களையும் இணைப்பதன் மூலம் ஒரு வெற்றிகரமான வர்த்தக உத்தியை உருவாக்க முடியும். முதலீட்டாளர்கள் பொதுவாக இரு வகையான குறிகாட்டிகளையும் சமநிலைப்படுத்தி சந்தையில் நகர்வுகளை மேற்கொள்கிறார்கள். நடைமுறையில், பகுப்பாய்வாளர்கள் பெரும்பாலும் இரண்டு வகையான குறிகாட்டிகளையும் ஒன்றாகவே பயன்படுத்துகின்றனர்.
முடிவுரை
சந்தை நடத்தை மற்றும் பொருளாதாரப் போக்குகளைப் புரிந்துகொள்வதில் முன்னோடி மற்றும் பின் தங்கிய குறிகாட்டிகள் இரண்டும் முக்கிய பங்கு வகிக்கின்றன. முன்னோடி குறிகாட்டிகள் எதிர்கால நகர்வுகளை எதிர்பார்க்க உதவுகின்றன, அதே நேரத்தில் பின் தங்கிய குறிகாட்டிகள் ஏற்கனவே உருவான போக்குகளை உறுதிப்படுத்துகின்றன. ஒவ்வொரு வகையும் வெவ்வேறு நுண்ணறிவுகளை வழங்குகிறது, மேலும் ஒன்றை மட்டுமே நம்பியிருப்பது முழுமையற்ற படத்தை வழங்கக்கூடும். முன்னோடி மற்றும் பின் தங்கிய குறிகாட்டிகள் இரண்டையும் ஒன்றாகப் பகுப்பாய்வு செய்வதன் மூலம், முதலீட்டாளர்களும் பகுப்பாய்வாளர்களும் சந்தை நிலமைகளைப் பற்றிய தெளிவான புரிதலைப் பெறலாம் மற்றும் மேலும் தகவலறிந்த முடிவுகளை எடுக்கலாம்.
